Vizita e studentëve të MBE-së në “Geris Corporation” – Lidhja e teorisë me praktikën industriale

19/11/2024

Studentët e vitit të dytë të Fakultetit Menaxhment, Biznes dhe Ekonomi në UBT, në kuadër të lëndës “Menaxhimi i Operacioneve”, së bashku me profesorin Burim Berisha, zhvilluan një vizitë studimore në kompaninë “Geris Corporation” në Ferizaj.

Gjatë kësaj vizite, studentët patën mundësinë të mësojnë mbi transformimin dhe zgjerimin e operacioneve të kompanisë, e cila ka evoluar për të përmbushur kërkesat e tregjeve vendore dhe ndërkombëtare.

Përmes një bashkëbisedimi të hapur me drejtuesit dhe punonjësit e kompanisë, studentët diskutuan tema si inovacioni në prodhim, menaxhimi i zinxhirit të furnizimit dhe adaptimi ndaj ndryshimeve të tregut.

Këto aktivitete jo vetëm që pasurojnë përvojën akademike të studentëve, por edhe i pajisin ata me perspektiva praktike që rrisin aftësinë e tyre për të kontribuar në tregun e punës. Për më tepër, vizitat në kompani u japin mundësinë të ndërtojnë rrjete profesionale, që janë një faktor kyç në suksesin e tyre të ardhshëm.

Vizitat e tilla studimore mundësojnë që studentët tanë të ndërlidhin njohuritë teorike të përfituara gjatë ligjëratave me praktikën reale në industri. Ato i ndihmojnë studentët të kuptojnë më mirë proceset komplekse të menaxhimit të operacioneve, të zhvillojnë aftësi analitike dhe të marrin njohuri të drejtpërdrejta mbi sfidat dhe sukseset në tregun e punës.

Falënderojmë kompaninë “Geris Corporation” për mikpritjen dhe gatishmërinë për të ndarë praktikat e tyre të menaxhimit, duke ndihmuar në përgatitjen e brezit të ri të profesionistëve të menaxhimit të operacioneve.