UBT nis festivalin e fotografisë digjitale: “Beyond the Lens: Stories Untold”
16/01/2025Më 17 janar, në Parkun Shkencor, Inovativ, Teknologjik të UBT-së, do të mbahet për herë të parë Festivali i Fotografisë Digjitale, i titulluar “Beyond the Lens: Stories Untold”.
Ky event, organizuar nga Fakulteti i Arteve dhe Mediave Digjitale në UBT, do të eksplorojë fotografinë si medium për tregimin e historive, duke u fokusuar në narrativat e pathëna, zërat e margjinalizuar dhe çështjet bashkëkohore si identiteti, kujtesa dhe sfidat mjedisore.
Në këtë ekspozitë do të marrin pjesë 50 studentë, të cilët do të eksperimentojnë me koncepte dhe tema të ndryshme bazuar në ngjarje aktuale. Kreativiteti do të jetë i pakufizuar, ndërsa studentët do të kenë qasje të plotë në teknologjitë më të fundit në laboratorët e UBT-së.
Festivali synon të nxjerrë në pah rëndësinë e përdorimit të kamerës si dëshmitare e kohës sonë, duke kontribuar në zhvillimin e industrive kreative dhe ndarjen e këtyre narrativave me komunitetin.
Hyrja në këtë aktivitet është falas dhe të gjithë të interesuarit janë të mirëpritur të bashkohen më 17 janar, ora 17:00, për të përjetuar fuqinë e fotografisë si mjet shprehës e transformues.