UBT gati të nisë vitin e ri akademik 2024/25 – Qyteti i mençur që bashkon të rinjtë nga i gjithë rajoni me infrastrukturë moderne dhe bashkëpunime ndërkombëtare

04/10/2024

UBT është në përgatitjet e fundit për të mirëpritur studentët në fillimin e vitit të ri akademik 2024/25, duke ofruar një eksperiencë të veçantë akademike dhe profesionale për të rinjtë nga Kosova dhe i gjithë rajoni. Me infrastrukturën moderne dhe përkushtimin për inovacion, UBT është kthyer në një qendër të ekselencës arsimore, që përfshin jo vetëm zhvillimin akademik, por edhe bashkëpunimet ndërkombëtare me universitete dhe institucione prestigjioze në mbarë botën.

Qyteti i mençur i UBT-së, një koncept i ri dhe inovativ, është bërë kryeqendra për mijëra studentë që aspirojnë të ndjekin karrierën e tyre në fusha të ndryshme të shkencës, teknologjisë, inxhinierisë, biznesit dhe shumë disiplina të tjera. Ky qytet ofron një ekosistem të gjallë dhe dinamik, që përfshin laboratorë të avancuar, biblioteka të pajisura me literaturë bashkëkohore, hapësira sociale dhe argëtuese, si dhe mundësi të shumta për kërkime shkencore dhe projekte praktike.

Rektori i UBT-së, Prof. Dr. Edmond Hajrizi, thekson se ky vit akademik pritet të jetë një tjetër hap i madh përpara drejt ngritjes së standardeve arsimore dhe përgatitjes së studentëve për tregun global të punës.

“Ne kemi punuar pandërprerë për të siguruar që studentët tanë të kenë mundësinë të përfitojnë nga teknologjitë më të fundit dhe nga një rrjet i gjerë bashkëpunimesh ndërkombëtare, duke i pajisur ata me aftësitë dhe njohuritë që kërkohen në botën moderne”, shprehet Rektori Hajrizi.

Në këtë vit të ri akademik, UBT pritet të ofrojë edhe më shumë mundësi për studime jashtë vendit, përmes marrëveshjeve të nënshkruara me universitete partnere nga Evropa dhe Amerika, si dhe përmes programeve të mobilitetit të studentëve, të cilat do të ndihmojnë të rinjtë të zgjerojnë horizontet e tyre dhe të zhvillojnë përvoja ndërkulturore.

Në një epokë ku inovacioni dhe qëndrueshmëria janë sfidat kryesore të shoqërisë globale, UBT po dëshmohet si një institucion udhëheqës në fushën e arsimit të lartë. Një nga arritjet më të mëdha është renditja në mesin e Top 200 Universiteteve më të mira në botë për luftën ndaj Ndryshimeve Klimatike nga GreenMetric World University Ranking 2023, duke theksuar përkushtimin e institucionit për promovimin e kampuseve të gjelbra dhe praktikave të qëndrueshme mjedisore. Krahas kësaj, UBT është ranguar për inovacion dhe revolucionin e katërt industrial në WURI, si dhe është njohur nga SCImago si institucioni më i mirë privat në trojet shqiptare për vitin 2024.

Rritja e vazhdueshme e UBT-së në renditje botërore, si dhe fitimi i çmimit “Europian Young Entrepreneurial University of the Year” nga Triple E Awards në Lisbona, tregon nivelin e lartë të përkushtimit të institucionit ndaj cilësisë, inovacionit dhe sipërmarrësisë. Këto arritje, së bashku me pozicionimin e tij të fortë në platformën “Webometrics” për numrin e citimeve të publikimeve të stafit, dëshmojnë ndikimin e jashtëzakonshëm që UBT ka në kërkimin shkencor dhe në përgatitjen e studentëve për një treg pune gjithnjë e më shumë të globalizuar dhe konkurrues.

Me fillimin e vitit akademik 2024/25, UBT vazhdon të forcojë pozitën e tij si një qendër për inovacion, zhvillim shkencor dhe përgatitje për tregun e punës, duke bashkuar të rinjtë nga i gjithë rajoni dhe përtej tij, në një qytet të mençur që synon të përgatisë liderët e së ardhmes.