Studentja Erblina Vuniqi në praktikë profesionale në Ministrinë e Mbrojtjes – Një hap i madh për karrierën e saj në siguri

04/04/2025

Studentja e Fakultetit të Studimeve të Sigurisë në UBT, Erblina Vuniqi, po dëshmon aftësitë dhe përgatitjen e saj akademike përmes një eksperience të rëndësishme profesionale në Ministrinë e Mbrojtjes së Kosovës. Ajo është duke ndjekur praktikën në Departamentin e Politikave të Mbrojtjes dhe Strategjisë Ushtarake, ku po zhvillon njohuritë e saj në një ambient profesional të nivelit të lartë.

Përmes kësaj praktike, Erblina po merr pjesë aktive në analizimin dhe hartimin e strategjive mbrojtëse, duke u njohur me politikat kyçe të sigurisë dhe mbrojtjes në Kosovë. Përvoja në Ministrinë e Mbrojtjes i ka mundësuar asaj të punojë përkrah ekspertëve të fushës, të marrë pjesë në diskutime strategjike dhe të kuptojë më nga afër mekanizmat e mbrojtjes dhe sigurisë kombëtare.

“Ky angazhim më ka ndihmuar të zbatoj njohuritë teorike në praktikë dhe të thelloj të kuptuarit tim për politikat mbrojtëse të vendit. Përvoja në këtë departament më ka motivuar edhe më shumë për të kontribuar në fushën e sigurisë dhe mbrojtjes në të ardhmen”, shprehet Erblina.

Ky sukses është një dëshmi e cilësisë së lartë të studimeve në UBT, i cili përmes programeve të tij moderne dhe bashkëpunimeve institucionale, po u krijon studentëve mundësi të jashtëzakonshme për të përgatitur veten për tregun e punës dhe për të dhënë kontribut konkret në zhvillimin e sektorëve kyç të shtetit.