Studentët e Fakultetit të Inxhinierisë së Ndërtimit dhe Infrastrukturës vizitojnë Stacionin Hekurudhor në Fushë Kosovë
24/12/2024Një grup prej 33 studentësh të Fakultetit të Inxhinierisë së Ndërtimit dhe Infrastrukturës, që ndjekin lëndën “Hekurudhat”, realizuan një vizitë studimore në stacionin hekurudhor të Fushë Kosovës. Kjo vizitë synonte njohjen nga afër dhe në mënyrë praktike me infrastrukturën hekurudhore dhe proceset e saj operacionale.
Gjatë vizitës, studentët, nën drejtimin e Dr. Sc. Visar Baxhukut dhe Sabit Thaqit, Drejtor i Divizionit të Udhëheqjes së Trenave, u njohën me:
- Organizimin dhe funksionimin e stacionit hekurudhor dhe ndërlidhjen me transportin intermodal;
- Pajisjet e sinjalizimit dhe komunikimit, përfshirë pajisjet regjistruese zanore dhe të shkruara;
- Trasenë e hekurudhës, përfshirë shtresat e trupit të trases, pragjet dhe binarët;
- Metodat e mirëmbajtjes së binarëve dhe trenave, si dhe pajisjet për kontrollin dhe rregullimin e lëvizjes së trenave nga dhoma qendrore e kontrollit.
Vizita përfshiu edhe analizimin e frekuencës së lëvizjes së trenave, sfidat në funksionim dhe proceset e monitorimit dhe planifikimit të linjave.
Në përfundim, studentët vlerësuan se aktiviteti përmbushi qëllimin edukativ, duke lidhur në mënyrë praktike dijet teorike të përfituara në auditor me realitetin e funksionimit të një stacioni hekurudhor.