Rektori Hajrizi pjesëmarrës në takimin vjetor të Aleancës më të madhe të Universiteteve Evropiane për Edukimin Dual EU4DUAL në Francë

02/04/2025

Rektori i UBT-së, Prof. Dr. Edmond Hajrizi, mori pjesë si anëtar i Bordit Këshillëdhënës Industrial në takimin vjetor të Aleancës më të madhe të Universiteteve Evropiane për Edukimin Dual EU4DUAL, i cili u mbajt në Institutin e Teknologjisë ESTIA në Francë. Ky takim ka të bëjë me avancimin dhe përmirësimin e arsimit dual në Evropë dhe mbledh përfaqësues të institucioneve edukative, industrisë dhe sektorëve të inovacionit.

Gjatë këtij takimi, Rektori Hajrizi prezantoi UBT-në dhe modelin e tij të edukimit dual, duke theksuar veçoritë dhe sukseset e ekosistemit të UBT-së. Ai diskutoi mbi rëndësinë e bashkëpunimit të ngushtë mes universiteteve dhe industrisë, si dhe ndikimin e UBT-së në përgatitjen e studentëve për tregun e punës dhe nevojat e tij të zhvilluara. Prezantimi i tij shpjegoi gjithashtu strategjitë dhe praktikat që UBT implementon për të krijuar mundësi të mëdha për studentët, duke i përgatitur ata për një karrierë të suksesshme në sektorët kyç të industrisë dhe teknologjisë.

Takimet e partnerëve të aleancës EU4Dual, që kanë vazhduar për disa ditë, kanë mbledhur ekspertë dhe përfaqësues të lartë nga fusha e arsimit, industrisë dhe inovacionit.

Rektori Hajrizi ka zhvilluar një sërë takimesh dhe vizitash me përfaqësues të universiteteve të ndryshme pjesëmarrëse, duke promovuar modelin e UBT-së dhe duke diskutuar mundësi bashkëpunimi për të avancuar arsimin dual dhe për të ndihmuar zhvillimin e kompetencave dhe aftësive të studentëve.

Kjo ngjarje u ofroi pjesëmarrësve mundësi për të diskutuar sfidat dhe mundësitë që paraqiten në edukimin dual, veçanërisht në kontekstin e ndryshimeve të shpejta në tregun global të punës.