Ish-studentja, Albina Zeneli punësohet në UBT

06/12/2024

Ish-studentja e Fakultetit Media dhe Komunikim në UBT, Albina Zeneli, tashmë me një përvojë në mediat vendore dhe rajonale, është punësuar në UBT, ku përveç angazhimeve në portalin UBTNews dhe Campus Radio, është angazhuar edhe si mentore për të udhëhequr vizitat studimore të studentëve të Medias dhe Komunikimit në mediet e Kosovës, Shqipërisë e Maqedonisë së Veriut.

Albina Zeneli thotë se, po fillon një karrierë të re dhe se po jep kontribut aty ku është rritur dhe ngritur në fushën profesionale, duke treguar aftësi e zotësi edhe si studente e Bachelorit, por edhe në Master.

Zeneli falënderon stafin akademik të UBT-së për angazhimin dhe ndihmën e vazhdueshme që japin për studentët, si dhe vlerëson se ndjehet e lumtur të punojë dhe veprojë bashkë me ta.

“Kuptohet për mua është nder dhe privilegj të jem pjesë e Medias në UBT, një ekip shumë profesional dhe i përgatitur për të ofruar çdo informacion që ndodh në UBT dhe jashtë saj. Aty ka një atmosferë të mirë. Ndihem rehat në mesin e këtyre kolegëve”, shprehet Zeneli.

Përndryshe, Albina ka qenë pjesë e mediave vendore dhe rajonale, ka krijuar gazetari profesionale në fushën e showbizit, si dhe ka prezantuar ngjarje të ndryshme me rëndësi. Ajo gjithashtu është e përgatitur edhe në gazetarinë digjitale.

“Nga zemra i falënderoj profesorët e Medias dhe Komunikimit nga të cilët kam mësuar shumë, sepse prej tyre e mësova dhe e përvetësova eksperiencën e gazetarisë, të mirat dhe rreziqet që ofron ky profesion. Pra ata ishin shtylla ime dhe u jam mirënjohëse përjetësisht”, përfundon Zeneli.