![](https://www.ubt-uni.net/wp-content/uploads/2018/10/UBT0347-1-768x512.jpg)
Leibovich Avital mban ligjëratë tematike për studentët e UBT-së
26/10/2018Drejtoresha e American Jewish Comittee në Jerusalem Leibovich Avital, ka qëndruar për herë të parë në Kosovë, me ç’rast zgjodhi UBT-në për të dhënë një ligjëratë tematike për studentë të institucionit.
Tema që ajo e trajtoi, “Sfidat strategjike të Izraelit”, ngjalli interes të madh tek studentët, të cilët u informuan jo vetëm për sfidat e Izraelit, por edhe të shteteve që e kufizojnë, duke e vënë në fokus përballjen e tyre me terrorizmin.
Rektori i UBT-së, prof. dr Edmond Hajrizi tha se është shumë e rëndësishme që studentët të marrin informacione mbi tematike të tilla, veçanërisht nga njerëz profesionistë.
“Bota po përballet me probleme të shumta dhe ne vazhdimisht po servohemi me informacione nga më të ndryshmet dhe më kontradiktoret, andaj është jetike që studentët tanë të marrin informacione nga njerëz kompetentë”, vlerësoi Hajrizi.
American Jewish Comittee, Avital Leibovich tregoi për studentët se jo vetëm Izraeli, por mbarë vendet në botë po përballen me sfida, të cilat në vija të trasha janë të ngjashme për të gjitha shtetet, por sipas saj, është e rëndësishme që në situata krize, vendet të gati për ët ofruar ndihmë të çfarëdo lloji.
“Për vite më radhë, prejse ka filluar lufta në Siri, Izraeli ka mbajtur të hapur kufijtë e vet për refugjatët sirianë, të cilëve u ka ofruar ushqim, strehim dhe ndihmë mjekësore. E tërë kjo edhe përkundër faktit që ne nuk kemi marrëdhënie të mira mes vete si shtete, por gjithmonë jetët e njerëzve vijnë në radhë të parë, tregoi ajo.
Në fund të ligjëratës, dhjetëra studentë drejtuan pyetje për Leibovich Avital, që kishin të bënin me sigurinë shtetërore të Izraelit, sigurinë në botë, nivelin e lirisë së mediave në Izrael, lirinë e shprehjes në vendin e saj, etj.