Rektori Hajrizi mori pjesë në Konferencën Vjetore të EU4DUAL në Spanjë
03/04/2025Rektori i UBT-së, Prof. Dr. Edmond Hajrizi, mori pjesë në Konferencën Vjetore të Aleancës më të madhe të Universiteteve Evropiane për Edukimin Dual – EU4DUAL, e cila u mbajt në San Sebastian në Spanjë. Kjo ngjarje mblodhi përfaqësues nga universitetet më prestigjioze të Evropës, institucione kërkimore dhe industria për të diskutuar mbi zhvillimet më të fundit në arsimin dual dhe ndikimin e tij në tregun e punës dhe inovacionin global.
Gjatë konferencës, Rektori Hajrizi ishte pjesë e debatit dhe diskutimeve kyçe mbi ekonominë e gjelbër (green economy), të ardhmen e punës (future work), shëndetin (health), prodhimtarinë e qëndrueshme dhe inteligjencën artificiale (AI).
Ai zhvilloi takime të rëndësishme për përfaqësues të tjerë dhe ndau përvojën dhe qasjen e UBT-së në këto fusha, duke theksuar rëndësinë e edukimit të bazuar në praktikë, inovacionit teknologjik dhe bashkëpunimit ndërmjet akademisë dhe industrisë.
UBT është ranguar dhe ka marrë çmime botërore për fushat përkatëse, sikurse për Generativ AI është renditur në vendin e 26 nga WURI, e po ashtu në top universitetet më të mira për mjedisin dhe qëndrueshmërinë klimatike nga Green Metric, si dhe për inovacion, cilësi, teknologji e të tjera. Këto arritje Rektori Hajrizi i ka theksuar edhe gjatë diskutimeve në Konferencën Vjetore të EU4DUAL në Spanjë, duke ndarë përvojën dhe qasjen e UBT-së për integrimin e inovacionit dhe teknologjive të avancuara në arsimin dhe kërkimin shkencor.
UBT është institucioni udhëheqës në Kosovë dhe rajon, që integron edukimin dual dhe qasjet moderne të mësimdhënies, me qëllim krijimin e një gjenerate të përgatitur për sfidat dhe mundësitë e së ardhmes.
