Profesori i UBT-së, Blerim Emerllahu, performon në Kongresin e 13-të Europian të Klarinetës

Ky kongres, një ndër ngjarjet më të mëdha dhe prestigjioze të muzikës klasike në Evropë, mblodhi muzikantë dhe artistë të shquar nga e gjithë bota për të shkëmbyer ide dhe përvojë, si dhe për të performuar për publikun ndërkombëtar.

Ky edicion i Kongresit ofroi mundësi të shumta për shkëmbim përvoje dhe performancë, dhe Prof. Emerllahu mori pjesë në një moment të veçantë të ngjarjes: ai u prezantua me një duet solistik me klarinetisten e njohur ndërkombëtare, Prof. Barbara Borowicz.

Performanca e tij u realizua nën shoqërimin e Ansamblit të Klarinetës të Akademisë “Krzysztof Penderecki” të Polonisë, një trupë muzikore me renome ndërkombëtare, e cila i shtoi më shumë shpirt dhe emocion interpretimit të tyre.

Kulmi i natës koncertale ishte prezantimi i premierës botërore të kompozicionit të ri të titulluar “Fountains”, i shkruar nga kompozitori i njohur shqiptar, Prof. Valton Beqiri. Ky veprim muzikor, i cili është një krijim modern për klarinetë dhe ansambël, pasqyron mjeshtërinë e Beqirit në bashkimin e elementeve klasike dhe atyre moderne, duke krijuar një përvojë të veçantë për auditorin. Kompozicioni është frymëzuar nga figura të natyrës dhe tingujt e ujit, që i japin një dimension të ri dhe freskues konceptit të muzikalitetit. Prezantimi i kësaj vepre botërore është një moment kyç në karrierën e kompozitorit dhe një mundësi për të promovuar krijimtarinë shqiptare në skenën ndërkombëtare./UBTNews/