Rektori Hajrizi mbajti një ligjëratë rreth sistemeve të mençura, të qëndrueshme dhe marketingut 4.0 në Korçë

12/12/2023

Rektori i UBT-së, Prof. Dr. Edmond Hajrizi zhvilloi një ligjëratë të organizuar nga UBT Korça Innovation and Technology Hub dhe Universiteti “Fan S. Noli” në Korçë – Fakulteti Ekonomik, lidhur me sistemet e mençura dhe të qëndrueshme, si dhe marketingun 4.0.

Rektori Hajrizi shpjegoi rëndësinë e përdorimit të teknologjisë dhe metodave inovative në strategjitë e marketingut në epokën digjitale. Ai analizoi rolin e marketingut 4.0, duke theksuar rëndësinë e përshtatjes së strategjive të marketingut me trendet e fundit teknologjike, përfshirë inteligjencën artificiale, analizën e të dhënave dhe digjitalizimin e proceseve.

Gjithashtu, Rektori Hajrizi foli mbi përdorimin e sistemeve të mençura dhe të qëndrueshme, duke theksuar vlerën e tyre në avancimin e trajtimit të informacionit dhe në ndërtimin e një mjedisi të qëndrueshëm në fushën e biznesit dhe teknologjisë.