UBT pjesëmarrës në ngjarjen historike të nënshkrimit të versionit të ri të deklaratës “Magna Charta Universitatum”

16/09/2022

Në një ceremoni solemne të organizuar sot në Universitetin e Bolonjës në Itali, rektori i UBT-së, Prof. Dr. Edmond Hajrizi ka nënshkruar versionin e ri të deklaratës “Magna Charta Universitatum”.

Versioni i ri i deklaratës së nënshkruar në vitin 2020 nga të gjitha universitetet pjesëmarrëse duke përfshirë edhe UBT-në, si institucioni i parë dhe i vetëm nga Kosova që nënshkruan këtë deklaratë, zëvendëson deklaratën e parë të nënshkruar në vitin 1988, me rastin e 900 vjetorit të Universitetit të Bolonjës.

UBT është pranuar në “Magna Charta Universitatum” në vitin 2020, por për shkak të COVID-19 ceremonia solemne për nënshkrimin e versionit të ri të kësaj deklarate është bërë këtë vit në Universitetin e Bolonjës, duke dëshmuar dhe pohuar edhe njëherë parimet themelore mbi të cilat duhet të bazohet misioni i universiteteve.

Përmes nënshkrimit të këtij dokumenti, UBT është bërë pjesë e një rrjeti të madh global të më shumë se 900 institucioneve të arsimit të lartë të të gjithë botës që kanë nënshkruar këtë deklaratë, e që për Kosovën është një hap shumë i rëndësishëm për përfaqësimin e saj në fushën e arsimit në arenën ndërkombëtare, dhe versioni i ri i “Magna Charta Universitatum” 2020, parasheh lirinë akademike, përgjegjësinë për të ndihmuar dhe demonstrimin që së bashku të ndryshojmë pozitivisht botën dhe të ruajmë planetin.

Përmes nënshkrimit të këtij dokumenti, UBT konfirmon vizionin dhe misionin e tij konform kësaj deklarate dhe i bashkohet një rrjeti të madh global të më shumë se 900 institucioneve të arsimit të lartë të të gjithë botës që kanë nënshkruar këtë deklaratë.