Banka Ekonomike e Kosovës menaxhohet nga një ish-studente e UBT-së

Banka Ekonomike e Kosovës menaxhohet nga një ish-studente e UBT-së

Ish-studentja e UBT-së në MBE, Merita Gjyshinca – Peja, tashti e 3 vjet është duke e mbajtur postin e kryeshefes ekzekutive në Bankën Ekonomike, teksa njëkohësisht është duke i mbaruar edhe studimet e doktoratës për Menaxhment Strategjik dhe Udhëheqje në IEDC Bled School of Management, në Slloveni.

 

Arritjet e saj në aspektin profesional janë fryt i punës dhe angazhimit të vazhdueshëm, por sipas saj, ndonëse rrugëtimi drejt suksesit nuk ka qenë i lehtë, në UBT e ka gjetur mbështetjen e nevojshme.

“Balancimi i kohës kushtuar familjes, punës dhe studimeve  në një universitet me shumë kërkesa në procesin akademik, siç është UBT, nuk ishte aspak e lehtë, mirëpo falë përkrahjes së familjes, guximit, vendosmërisë dhe fleksibilitetit, të cilin e ofron UBT, unë e kalova këtë kapitull, për të vazhduar me rrugëtimin tim drejt realizimit të ëndrrave të mia”, tha Gjyshinca - Peja.

 

Duke treguar për sfidat personale drejt përmbushjes së qëllimeve të saj, ajo i inkurajoi të rinjtë, e në veçanti gjininë femërore, që asnjëherë të mos dorëzohen përballë vështirësive të natyrave të ndryshme, gjatë zhvillimit dhe ngritjes profesionale.

“Për disa arsye objektive, edhe pse shumë i vogël në moshë, djali im ishte pjesëmarrës me mua në disa nga ligjëratat e mbajtura gjatë vitit të kaluar në Slloveni. Me këtë, dëshiroj t’i inkurajoj të gjithë, e në veçanti vajzat e gratë, që ta sfidojnë veten, të jenë të përkushtuara në arritjen e qëllimeve të tyre në shkollim dhe në zhvillim profesional”, theksoi ajo, nën arsyetimin se, “një shoqëri me shumë gra udhëheqëse, është potencial i fuqishëm për një mirëqenie më të begatë  shoqërore”.

 

Ajo vlerësoi se e ardhmja e suksesshme e studentëve të UBT-së, është e sigurt dhe e pakontestueshme, pasi që sipas saj, ata që studiojnë në këtë institucion, i kanë hapur vetes rrugë drejt një të ardhme të shkëlqyer.

Lajme